Kryetari i Obiliqit Xhafer Gashi ka reaguar pas deklaratave nga partitë opozitare në këtë komunë, Lëvizja Vetëvendosje dhe Lidhja Demokratike e Kosovës (LDK), duke thënë se dy partitë opozitare në Obiliq i ka kapur frika pas dorëheqjes së tij dhe se ato e kanë humbur peshën e arsyes së logjikës.
Gashi në një reagim në Facebook ka shkruar se “rrugëtimi im do të jetë vetëm me qytetarët e Obiliqit dhe se Iniciativa Qytetare do të jetë strehë e gjithë qytetarëve me vullnet të mirë, të cilët kanë vizion dhe ia duan të mirën qytetit të Obiliqit.”
Ndryshe, Xhafer Gashi dje dha dorëheqje nga të gjitha strukturat e partisë së Ramush Haradinajt – AAK, dhe se do të mbetet vetëm si kryetar i Komunës së Obiliqit.
Reagimi i plotë:
“Dy partitë opozitare në Obiliq, i paska kapur frika pas dorëheqjes sime, si duket edhe disponimi e mbështetja e qytetarëve të Obiliqit për këtë nismë timen i ka bërë që të humbin peshën e arsyes e logjikës, Thaçi nga VV-ja më akuzon se po ‘viktimizohem’, po harron Halili se kur unë kam projektuar thyerjen e kufirit qindravjeçar shqiptaro-shqiptar, ai ka qenë duke u strehuar në Castel, gjeneratat e vjetra e njohin historinë famëkeqe të Castel-it, tash gjeneratat e reja është mirë t’i njoftoj Halili.
Ndërsa, kundërkandidati im në dy palë zgjedhje lokale, ndaj të cilit kam triumfuar bindshëm, Krasniqi nga LDK-ja, konsideron se unë po tentoj të gjejë ‘strehë’ në kasollen e tij, të cilën e solli në këtë gjendje nga injoranca e tij dhe e njerëzve tij, normalisht që injorimi e distancimi nuk ju hap mundësi gjeneratave të reja.
Dëshiroj t’ua bëj të qartë të dyve, se rrugëtimi im do të jetë vetëm me qytetarët e Obiliqit, Iniciativa Qytetare do të jetë strehë e gjithë qytetarëve me vullnet të mirë të cilët kanë vizion dhe ia duan të mirën qytetit të Obiliqit.
Shihemi në garën e radhës, rezultatin do ta keni të njëjtin!
