Presidenti serb Aleksandar Vuçiq deklaroi sot se autoritetet në Prishtinë as nuk duhet të ëndërrojnë që Serbia do ta njohë pavarësinë e Kosovës.
Ai iu përgjigj kështu deklarimeve të presidentes së Kosovës, Vjosa Osmani, e cila ka thënë se prapa gjitha “non papers” të kohëve të fundit qëndron Serbia.
Osmani tha dje se të gjitha dhe idetë e paraqitura në to, janë destabilizuese për rajonin.
“Më lejoni t’ju them menjëherë se ajo që është shkruar në të nuk do të ndodhë, njohja nuk është e pranueshme për Serbinë,” u tha Vuçiq gazetarëve në Novi Sad, ku ai inspektoi punimet në ndërtimin e një spitali të ri për trajtimin e sëmundjes COVID-19.
Janë dy dokumente “non paper”, të cilat janë publikuar nga mediat në Ballkan në periudhën e fundit, autenticiteti i të cilave nuk është vërtetuar.
Njëri dokument është publikuar nga mediat sllovene në të cilën pretendohej se kryeministri i Sllovenisë, Janez Jansha i ka dorëzuar Brukselit zyrtar, një dokument, ku besohet të jetë thënë se procesi i dezintegrimit të ish-Jugosllavisë nuk është finalizuar. Dokumenti tjetër thuhet të jetë hartuar nga Gjermania dhe Franca, si iniciativë për rinisjen e dialogut mes Kosovës dhe Serbisë, dhe përmbylljen e këtij procesi me një marrëveshje përfundimtare.
Në dokument thuhet se Kosova e Serbia duhet të pajtohen që të themelohet një i ashtuquajtur “distrikt autonom i Kosovës Veriore”, me kompetenca vetëqeverisëse. Ai do të përfshinte komunat me shumicë serbe në veri të Kosovës. Gjermania dhe Franca e kanë quajtur lajm të rremë dokumentin në fjalë./tch