Kryetari i Bashkisë së Tiranës, Erion Veliaj, ka vizituar Komunën e Prishtinës, me ç’rast i është ndarë edhe Çelësi i Qytetit, raporton Ekonomia Online.
Kryebashkiaku Veliaj tha se ndihet i nderuar që po pranon Çelësin e Qytetit dhe shumë krenar për arritjet e Kosovës, pasi që disa vjet më parë ” askush nuk kishte besuar që ajo do të bëhej e pavarur”.
“Në ato vite askush nuk kishte besuar që Kosova do të bëhej e pavarur. Por tashmë është edhe e avancuar me kulturë, siç është Mainfesta. E kam zemrën plot dhe ndihem i prekur nga ky vleresim. Ne jemi tifozët e juaj më të mëdhenjë. Duam të jemi gjithnjë krah për krah”, u shpreh Veliaj.
Tutje, Veliaj tha se do të ketë një rezolutë për Kosovën në Parlamentin e Shqipërisë, në lidhje me raportin e Dic Martyt.
“Kryeministri ynë vendosi të marrë aksion ligjor, jo vetëm batuta. I kemi votat për këtë rezolutë. I gjithë fokusi është te Kosova. Pashë dhe shumë gazetarë që kanë shkruar mirë për Prishtinën. Çdo gjë fillon nga gjërat e vogla”.
Kryetari i Prishtinës, Përparim Rama, falenderoi Veliajn për iniciativën që do të merret nga ana e Shqipërisë, duke thënë se duke i ndihmuar njëri tjetrit arrihen piedestalet më të larta.
Ai gjithashtu e njoftoi Veliajn për disa nga projektet e Prishtinës, pasi ky i fundit u interesua sidomos për çështjen e trafikut.
“Ideja është të zhvillohemi së bashku dhe ne e shohim Tiranën si vend unik. E shoh që së bashku, t’i ndihmojmë njëri tjetrit, t’i mbërrijmë piedestalet më të larta. Kemi pasur vrull të zhvillimit të sektorit privat, por kemi ngecur në kanalizime e shkolla. Projekti i madh është unaza e mesme. Me marrjen e menaxhimit të kryeqytetit kemi marrë disa vendime”, tha ai.