Deputetja Albena Reshitaj theksoi se arsyeja e qëndrimit të saj në sallë sot për zgjedhjen e presidentit të Kosovës, ka qenë për funksionalizmin e institucioneve të vendit. Ajo ka mohuar të ketë pasur ndonjë favor për të qëndruar në sallë përkundër partisë së saj që ka kundërshtuar një veprim të tillë.
Deputetja nga AAK tha se nuk është larguar nga kjo parti.
Reshitaj: Nuk funksionoi me logjiken e favoreve
“E para, nuk kam mundur të lejoj që e ardhmja e funksionalizmit të institucioneve të vendit tonë respektivisht të funksionalizimit të institucionit më kredibil të vendit presidencës me u varur prej Listës serbe apo me u bllokuar nga Lista serbe, e cila siç e dimë të gjithë është e direktuar komplet nga politikat e gabuara të Vuçiqit nga Beogradi. E dyta, ju dini që ne jemi në një fazë të keqe të pandemisë ku nga po thuajse 1 mijë vetë në ditë kemi njerëz të infektuar dhe kemi rekord të vdekjeve të pacientëve nga ky virus dhe është më e pakta që qytetarëve të vendit i duhet që të shkojmë në zgjedhje… Lus të gjithë deputetët e Kosovë ashtu siç kam bërë edhe me partinë të cilës i takoj në disa forume të AAK-së dhe kam kërkuar që ne si GP të jemi pjesë e seancës. Unë nuk kam ardhur këtu të votoj pro asnjë kandidati, por thjesht kam ardhur të votoj… Nuk jam larguar, absolutisht, unë kam një mendim ndryshe, kam vendosur që është më e duhura, më e mira për vendin që ne të jemi në seancë për tej arsyetimeve të tjera… Unë nuk funksionoj me logjiken e favoreve”, tha ajo.
Seanca për zgjedhjen e presidentit është shtyrë për nesër në orën 17:00, pasi nuk pati kuorum për votim./I. Shabani/
