Varianti Delta po i atakon moshat e reja dhe gratë shtatzëna të cilat janë me imunitet më të zvogëluar, kështu ka thënë Jakup Ismaili, drejtor i Klinikës Gjinekologjike në QKUK.
Ismaili tha se simptomat janë të njëjta si te fëmijët po ashtu edhe te të rriturit. Sipas tij, format e rënda lënë komplikime në mushkëri nga gjashtë deri në një vit.
“Varianti Delta po i atakon moshat e reja dhe ato gratë shtatzëna që janë me imunitet më të zvogëluar kështu janë disa forma më agresive sidomos te shtatzënat që kanë qenë të hospitalizuara tek ne. Simptomat janë të njëjta me probleme kardiovaskulare me temperaturë, kollitje. Format e rënda lënë komplikime në mushkëri dhe rehabilitimi zgjat nga gjashtë muaj deri në një vit”, tha Ismaili.
Ismaili lut të gjitha gratë shtatzëna që të vaksinohen sepse është mënyra më efikase për të parandaluar vdekjen nga COVID-19.
“Përveç respektimit te masave anti-COVID, distancë, ikja nga tubimet, higjienë personale, bartja e maskave, mënyra më efikas për të parandaluar vdekjen nga kjo sëmundje është vaksinimi. Andaj lus të gjitha shtatzënat që nuk janë vaksinuar të vaksinohen sepse vaksinimi shpëton jetë”, u shpreh Ismaili.
Ndërsa doktoresha në Klinikën e Pediatrisë, Violeta Grajqevci ka thënë se zakonisht në klinikë lajmërohen dy forma të ndryshme me probleme të frymëmarrjes duke shkaktuar pneumoni të rëndë sidomos te fëmijët që janë të hospitalizuar.
Sipas saj, situata në Klinikën e Pediatrisë është stabile dhe janë vetëm 23 shtretër të dedikuar për fëmijët me COVID-19.
“Zakonisht lajmërohen dy forma të ndryshme me probleme të frymëmarrjes, respiratorë duke shkaktuar pneumoni të rëndë sidomos te fëmijët që i kemi të hospitalizuar. Momentalisht ne nuk mund ta dimë për arsye se tashmë është kjo formë e re në këta dy muajt e fundit që më e shpeshtë është në Kosovë që është lajmëruar te moshat pediatrike mbetet të diskutohet më tutje për pasojat që do të lërë për arsye se ende i kemi disa fëmijë në shërim por për pasoja afatgjate ende nuk mund të themi diçka serioze. Simptomat më të shpeshta janë me kollitje, plogështi, lodhje, madje dhimbje muskujsh dhe kokëdhimbje, jashtëqitje ujore poashtu edhe më frymëzënie sidomos te format më të rënda kur veç janë atakuar mushkëritë me problemet e pneumonisë atëherë kemi shenja të vështirësisë në frymëmarrje, nevojë për oskigjenoterapi e shumë probleme tjera. Situata është stabile sa i përket menaxhimit të këtyre rasteve. Kemi material të mjaftueshëm si në aspektin e dhënies së terapisë dhe materialit mbështetës poashtu edhe të stafit i cili punon në këtë repart. Momentalisht i kemi 23 shtretër të dedikuar për fëmijët me COVID. Kështu që kemi hapësirë të mjaftueshme për pranimin e këtyre fëmijëve”, tha Grajqevci.
Kurse Infektologu Hamdi Ramadani theksoi se në Klinikën e Neanatologjisë ka vdekur një fëmijë i moshës tre javësh i cili ishte në gjendje të rëndë.
Sipas tij, këto lloje të viruseve nuk kanë treguar ndonjë ndërlikim shumë të rëndë deri në moshën 12 vjeç.
“Për fat të keq ka ndodhur një vdekje i një fëmije të moshës 3 javësh në Neanatologji, ku të dhënat e mjekëve tregojnë se ai pacient ishte në gjendje të rëndë. Një përqindjen e madhe e rasteve edhe te fëmijët deri në moshën 12 vjeçare kanë imunitetin më të fortë. Mirëpo ka përjashtime sikurse që ndodhi me rastin e vdekjes së fëmijës në Neanatologji. Këto lloje të viruseve nuk kanë treguar ndonjë ndërlikim shumë të rëndë deri në moshën 12 vjeç. Ende nuk na ndonjë të dhënë që duhet të vaksinohen edhe moshat që nga lindja deri në moshën 12 vjeç. Më vonë se a duhet të vaksinohen edhe moshat e hershme mbetet çështje shkencore e klinike. Është një numër relativisht i vogël i të infektuarve i moshës fëmijërore. Ata fëmijë që kanë pasur covid pozitiv dhe të cilët janë trajtuar duhet të monitorohen për disa javë që të tregojnë se çka do të ndodhë me efektet e mundshme anësore”, tha Ramadani.
