Raporti i Dick Martyn-it që hedh akuza për UÇK-në, është cilësuar nga kryeministri Edi Rama, si “fake news” më i rëndë në histori që baltos luftën e një kombi për liri, e që për fat të keq, prej tij, sot qëndrojnë të burg njerëz që luftuan për paqen.
Në një fjalim që zgjati dje rreth 1 orë në Asamblenë në Këshillit të Europës, kreu i qeverisë shqiptare iu ka kërkuar që ta zhbëjnë këtë raport, që të rrëzojnë akuzat që vijnë në drejtim të Kosovës dhe ish-drejtuesve të UÇK-së, jo për hir të Prishtinës zyrtare apo Shqipërisë, por për nderin e Europës. Një “Shtëpi e Verdhë” e një familjeje të varfër në Burrel, ku nuk kishte drita, ujë e as rrugë, sipas Ramës, ishte pikënisja e akuzave që të baltosej lufta dhe gjithë drejtuesit e Ushtrisë Çlirimtare të Kosovës, për thekson se në asnjë moment këto akuza nuk u bazuan mbi fakte e as prova.
Duke marrë shkas edhe nga libri i ish-kryeprokurores në Hagë, Carla Del Ponte ku pretendonte për krime të tmerrshme, Rama i prerë iu drejtua më një pyetje të pranishmëve në Asamble: Çfarë e ndaloi një prokurore të pushtetshme për të hetuar më tej? Kjo pyetje për Ramën, ende nuk ka marrë një përgjigje, për vetë faktin se nuk ekziston asnjë e tillë. Rama nuk ka kursyer kritikat për KiE në qëndrimin e mbajtur lidhur me këtë raport ndërsa është shprehur se ka ardhur momenti që besimi në institucionet ndërkombëtare duhet rivënë në vend.
Ndërkohë një pjesë thelbësore e fjalës së tij, ka qenë heqja e paraleleve me luftën, ku Ukraina është “Kosova dje” dhe Putin njësoj si Millosheviçi që sot solli vdekjen. Pa humbur kohë, Rama tha se ka ardhur momenti që ndërkombëtarët ta njohin “Kosova” dhe jo si “Kosovo”, pasi tashmë është një republikë e pavarur, e ndërsa kritikave të disa parlamentarë në KiE me argumentin se ”nuk respektoi institucionin, kreu i qeverisë shqiptare iu përgjigj shkurt, duke thënë nuk tërheq asnjë fjalë, madje u shpreh i gatshëm edhe për t’u përballur me debat, referuara debateve që pati me disa eruodepuetët rumunë dhe grekë.
