Përplasja mes institucioneve të reja të drejtësisë të kontrolluara nga pushteti dhe atyre pak ndërkombëtarëve që refuzojnë ta bëjnë të zezën të bardhë, po kap maja të pa para më parë.
Ndonëse prokurorja e Tiranës, Elizabeta Imeraj është në një proces tejet problematik vettingu, Këshilli i Lartë i Prokurorisë, KLP, i drejtuar nga Gent Ibrahimi, vendosi ta caktojë atë në pozicionin e Drejtuesit të Prokurorisë së Rrethit Gjyqësor Tiranë për një mandat 3 vjeçar.
Procesi i ngritjes në detyrë të Imerajt, prokurores që mbylli çështjen e tenderit me dokumenta fallco të unazës, u bë pa përfillur filtrat e vettingut. KLP tha se kreu një veting “paralel” dhe njoftoi më 13 mars se, verifikimi i pasurisë dhe figurës për Imerajn kishte rezultuar pa probleme, duke i lejuar të vazhdojë garën, si kandidate e vetme për kreun e prokurorisëmsë Tiranës.
Këshilli i Lartë i Prokurorisë ndryshoi me shumicë votash në tetor 2020 rregulloren për rekrutimin dhe karrierën e prokurorëve, duke i dhënë të drejtën vetes që të kryejë verifikimin e pasurisë dhe figurës për kandidatët, pa kaluar më parë testin e institucioneve të vetingut.
Pak ditë më parë, gjatë seancës së vettingut, përfaqësuesi i ONM-së, Theo Jacobs e akuzoi kryeprokuroren e Tiranës për një seri të gjatë veprash penale, përfshirë përgjime të paligjshme të kolegëve të tij ndërkombëtare, që pretendohet se janë fotografuar në marëdhënie erotike dhe shantazhim të anëtarëve të KPK-së që do jepnin vendimet për të.
Jacobs, në seancën dëgjimore që zgjati 8 orë, tha se kolegu i tij, Hans Kijlstra – tashmë i larguar nga ONM, i kishte lënë në dorë disa vëzhgime bashkë me informacionin e sigururuar nga dy burime, një shqiptar dhe një i huaj, që Imeraj kishte vënë njerëz ta ndiqnin dhe ta fotografonin, përfshirë pretendimin se kishin foto kompromentuese ndaj tij.
Rasti i Elisabeta Imerajt po dëshmon qartë se i gjithë korpusi i drejtësisë me njerëzit e caktuar nga kjo mazhorancë është futur në një spirale përplasjeje me vëzhguesit ndërkombëtarë dhe ata që janë pas tyre, që kërkojnë të ruajnë së paku fasadën e pavarsisë së procesit. Edhe institucionet e varura nga qeveria edhe trupa e vettingut që qëndroi si e tredhur, duket si kur dirigjohen nga e njëjta dorë që ka vënë në lëvizje dhe KLP-në.
Pikërisht raste si ky ku ata që shërbejnë, i shpëtojnë vettingut me vendime të çuditshme si ato të KLP të drejtjar nga Gent Ibrahimi, i kanë dhëne dërrmën e fundit besimit tek reforma në drejtësi, e cila po kthehet në një karagjozllëk në sytë e publikut.
@Lapsi.al