Kosova dhe Serbia janë përplasur mbrëmë në mbledhjen e Këshillit të Sigurimit të Kombeve të Bashkuara, ku u diskutua për Kosovën.
Ministrja e Punëve të Jashtme dhe Diasporës së Kosovës, Donika Gërvalla, ka deklaruar se shteti i Kosovës nuk ka dalë nga “lëvizjes separatiste, por nga gjenocidi”, duke përmendur këtu edhe rezistencën e popullatës ndaj okupatorit serb, ndërsa homologu i saj serb, Nikolla Selakoviq, ka akuzuar Ushtrinë Çlirimtare të Kosovës për krime kundër serbëve, duke përmendur edhe akuzat e Dick Martyt për trafikim organesh.
Gërvalla në fjalën e saj është shprehur krenare me UÇK-në, duke thënë se “burrat dhe gratë kanë mbrojtur njerëzit dhe shtëpitë e tyre”, ndërsa ka theksuar se presidenti serb, Aleksandër Vuçiq, ka qenë ministër i “Kasapit të Ballkanit, Sllobodan Millosheviq”.
Selakoviq në anën tjetër ka deklaruar se “kasapët e vërtet të Ballkanit” gjenden në Hagë të dyshuar për krime lufte, duke përmendur ish-presidentin e Kosovës, Hashim Thaçi dhe ish-kryeparlamentarin, Kadri Veseli, të cilët gjenden në paraburgim pranë Dhomave të Specializuara nën dyshimet për krime lufte dhe krime kundër njerëzimit.
Ministrja Gërvalla ka deklaruar se së fundmi vetë ish-senatori zviceran Dick Marty, i cili kishte hartuar raportin që akuzonte UÇK-në për krime lufte, ka deklaruar se është në mbrojtje të lartë nga autoritetet zvicerane pasi që ka qenë cak i një atentati të planifikuar nga shërbimet e inteligjencës serbe, në mënyrë që faji t’i hidhej Kosovës.
Selakoviq i ka quajtur këto raportime të pavërteta, duke thënë se abuzimi me to mund të bëj presion plotësues tek “dëshmitarët kyç që do të dëshmojnë në Hagë për krimet e kryera nga UÇK-ja”.
Deri sa Selakoviq ka akuzuar institucionet e Kosovës për qasje diskriminuese ndaj serbëve të Kosovës, duke përmendur këtu edhe aksionet e shpeshta të Policisë së Kosovës në komunat e banuara me shumicë serbe, Gërvalla ka thënë se aksionet nuk janë kryer për të trembur qytetarët, por kundër krimit.
Tutje, Gërvalla ka thënë se serbët nuk mund të ankohen për padrejtësi apo diskriminim në Kosovë, pasi që Kosova ka një Kushtetutë moderne e cila respekton të drejtat e minoriteteve, duke i përmendur këtu Selakoviqit se çdo Qeveri e Kosovës përfshinë në përbërje ministra nga pakicat dhe gjithashtu ata kanë 10 vende të rezervuara në Kuvendin e Kosovës.
Duke i përmendur Selakoviqit raportimet për planet e shërbimeve sekrete serbe për të vrarë Dick Martyn, Gërvalla ka thënë se ai në të vërtetë është mik i serbëve dhe jo i Kosovës, duke shtuar këtu se akuzat e tij ndaj UÇK-së do të rrëzohen në Gjykatë pasi që nuk janë të vërteta.
Ministrja Gërvalla ka deklaruar se Serbia i ka traditë vrasjet, duke përmendur këtu vrasjen e babait të saj, Jusuf Gërvallës në Gjermani.
“Babai im ishte një gazetar dhe muzikant në Kosovë. Ai u largua nga Jugosllavia që të shkonte në Gjermani dhe nga kjo tani ajo që quhej UDB, e tani BIA, që vranë në Gjermani në moshën 36 vjecare për qëndrimet e tij për lirinë e Kosovës dhe janë të njëjtët serbë që kanë vrarë mbi 39 disidentë kroatë në Gjermani. Është një traditë e gjatë e vrasjes së personave në Europë. Edhe kjo që Dick Marty tha, pasi ai nuk është mik i Kosovës dhe nuk do të jetë kurrë pasi akuzat që bëri ai do të bijnë në Gjykatë, por është mik i Serbisë dhe tregoi të vërtetën se deshët ju ta vrisni, është përvojë e gjatë e juaja. Të gjitha të nderuarit këtu e dinë”, tha ajo.
Kujtojmë se në mbledhjen e Këshillit të Sigurimit të Kombeve të Bashkuara u diskutua edhe për rolin e UNMIK-ut në Kosovë, ku Kosova, SHBA-të dhe Shqipëria kërkuan nga OKB-ja përfundimin e këtij misioni dhe tërheqjen e UNMIK-ut nga Kosova. /Lajmi.net
