Prej disa kohësh nuk është parë aktive në publik. Por Ministrja e Jashtme u bë lajm kur mbrëmë në orët e vona posto një shkrim të gjatë në Facebook.
Ajo paralajmëroi reforma të thella në diplomaci dhe shkarkime të diplomatëve që sipas saj janë emëruar jashtëligjshëm, raporton RTV Dukagjini.
Lirika Agusholli këtë proces e konsideron si jo transparent.
“Ministrja në këtë deklaratë nuk tregon se çfarë shkelje janë gjetur. Ajo nuk tregon se çfarë shkelje kanë hasur profesionistët që janë marrë me këtë punë. Pra si do të kthehen këta diplomatë që janë emëruar në bazë të ligjit për shërbim të jashtëm”, deklaroi Lirika Agusholli nga Grupi për Studime Juridike dhe Politike (GLPS), përcjell Telegrafi.
Në shënimin e saj Ministrja e Jashtme përmend edhe një rast ku sipas saj zyrtari i MPJ-së ka marrë kredi duke llogaritur në mëditjet e udhëtimit jashtë vendit.
Por kjo po shihet si diçka personale dhe sipas analistit Besnik Vasolli ky nuk duhet të jetë pjesë e diskursit të Ministres së Jashtme.
“Këto gjëra janë shumë personale. Ne të gjithë marrim kredi dhe kemi obligime për të paguar këste”.
Në vazhdimësi ka pasur kritika për punën e Ministres së Jashtme dhe Diasporës.
Në veçanti është kritikuar vendimi për t’i tërhequr ambasadorët në mënyrë grupore nga disa vende.
