Ushtruesja e detyrës së presidentes, Vjosa Osmani në Dita Botërore të Sindromës Down, ka thënë se Kosova të cilën e duan është Kosova në të cilën personat me Sindromën Down, ndihen të sigurt për të tashmen e tyre dhe janë entuziast për të ardhmen, njofton Insajderi.
Këtë koment Osmani e ka bërë të profilin e saj në facebook.
“Vizituam sot shoqatën Down Syndrome Kosova për të bashkëbiseduar me udhëheqësit e shoqatës, prindërit, e për të parë nga afër shërbimet që ofrohen aty për fëmijët dhe për të dëgjuar kërkesat për mbështetje institucionale. Kosova të cilën e duam është Kosova në të cilën personat me Sindromën Down ndihen të sigurt për të tashmen e tyre dhe janë entuziast për të ardhmen. E për të arritur këtë qëllim, së pari duhet të punojmë në vetëdijesim në mënyrë që përfundimisht të ndodhë integrimi i natyrshëm i personave me Sindromen Down në shoqërinë tonë”.
Tutje ajo ka shtuar se gjatë tërë këtij viti ka punuar që kjo kategori e njerëzve të ndjehen sikur të gjithë të tjerët.
“Jemi shumë më shumë të njëjtë se sa të ndryshëm. Pas një viti sfidues, përtej thirrjeve për mbajtje të distancës ne nuk kemi lënë gurë pa lëvizur që të mbesim të afërt e përzemërt me njëri tjetri. Në po këtë frymë, të punojmë së bashku për t‘u siguruar që të mos presim nga të tjerët të ndryshojnë e t’i përshtaten masës, por të ndryshojmë ne në mënyrë që ata që sot ndihen ndryshe e të përjashtuar, nesër të ndihen të dëgjuar e të integruar. Për sytë plotë jetë e buzëqeshjet më të dëlira, do jem gjithmonë mikesha juaj e përbetuar”./Insajderi.com
