153 persona janë shpallur tashmë të vdekur nga tragjedia e ndodhur mbrëmjen e djeshme në kryeqytetin e Koresë së Jugut, Seul.
Kaosi shpërtheu në lagjen më të famshme të kryeqytetit korean, Itewon, pasi 100,000 njerëz u grumbulluan në një rrugicë vetëm 12 metra të gjerë.
Shkak i tragjedisë është bërë pikërisht gjerësia e rrugës dhe tejkalimi i kapacitetit të njerëzve. Pamjet rrëqethëse tregojnë zonën e mbushur me frekuentues që mezi lëvizin pak para rrëmujës. Dëshmitarët kanë kritikuar mungesën e kontrollit të turmës dhe thonë se shërbimet e urgjencës u përfshinë vetëm kur përplasja u bë fatale.
Autoritetet nuk arritën të bënin përgatitjet për të menaxhuar numrin e parashikuar të njerëzve që planifikonin të vërshonin në zonë.
Adoleshentët dhe të rinjtë e emocionuar ishin derdhur në kryeqytet për të shijuar festimet e para të pakufizuara të Halloween në tre vjet që kur u hoqën rregulloret e Covid. Por në vend të kësaj, ata e gjetën veten të kapur në një rrëmujë të tmerrshme pasi festimet kishin tërhequr një numër të rrezikshëm njerëzish.
Në mënyrë tragjike, të paktën 153 persona u deklaruan të vdekur dhe 82 të tjerë të plagosur – 19 prej tyre në gjendje të rëndë.
Nga të vrarët, 97 ishin gra dhe 57 ishin burra. Katër viktima ishin vetëm adoleshentë, ndërsa 96 ishin rreth të 20-tave, njoftoi Ministria e Brendshme dhe Siguria e Koresë së Jugut. Zyrtarët e Koresë së Jugut thanë se vdekjet përfshinin 26 të huaj nga Kina, Irani, Rusia, Franca, SHBA, Australia, Uzbekistani, Vietnami, Kazakistani, Austria, Sri Lanka, Tajlanda dhe Norvegjia.
Dëshmitarët thonë se turma u bë gjithnjë e më e madhe ndërsa mbrëmja vazhdonte. Pak para orës 22:20, situata doli jashtë kontrollit pasi shpërtheu një rrëmujë, teksa njerëzit u detyruan të zbrisnin në rrugicën e ngushtë dhe të pjerrët pasi ajo tashmë ishte e mbushur me njerëz. Njerëzit në fillim të grumbullit filluan të binin në tokë nga mungesa e ajrit, por dhe përplasjet me njëri-tjetrin, duke i dërguar njerëzit poshtë tyre të përmbyseshin mbi të tjerët.
Nga ana tjetër, shumë njerëz pësuan anak në zemër për shkak të panikut dhe mungesës së ajërit.
Pamjet tmerruese të shpërndara në mediat sociale treguan disa njerëz që përpiqeshin të ngjiteshin në anët e ndërtesave për t’i shpëtuar presionit në rritje, ndërsa të tjerët thërrisnin me dëshpërim për ndihmë.