Kryeministri i Izraelit, Yair Lapid ka alarmuar botën me deklaratën e tij të fundit. Ai bëri një zbulim të rrallë për herë të parë për arsenalin bërthamor që disponon shteti që ai drejton. Duke folur në një ngjarje për të shënuar një ndryshim të udhëheqjes në Komisionin e Energjisë Atomike të vendit, Lapid iu referua aftësive mbrojtëse dhe sulmuese të Izraelit, si dhe asaj që ai i quajti “aftësitë e tjera” të tij që kuptohet si një referencë për armët bërthamore. “Arena operacionale në kupolën e padukshme sipër nesh është ndërtuar mbi aftësitë mbrojtëse dhe aftësitë sulmuese, dhe atë që mediat e huaja tentojnë ta quajnë “aftësi të tjera”. Këto aftësi të tjera na mbajnë gjallë dhe do të na mbajnë gjallë për sa kohë ne dhe fëmijët tanë jemi këtu”, tha Lapid. Izraeli besohet gjerësisht se zotëron disa qindra armë bërthamore, duke zhvilluar teknologjinë në vitet 1960. Ndryshe nga shumica e shteteve të supozuara për armë bërthamore, Izraeli kurrë nuk ka deklaruar zyrtarisht posedim. Në vend të kësaj, ajo ndjek një politikë të ‘paqartësisë’, që do të thotë se udhëheqësit izraelitë, kur shtyhen, kanë preferuar të bëjnë vetëm referencë të zhdrejtë ose të paqartë për armët bërthamore. Deklarata e parë e tillë u bë në fillim të viteve 1960 nga ministri i atëhershëm i mbrojtjes Shimon Peres, i cili tha se Izraeli “me siguri nuk do të ishte i pari që do të fuste armë bërthamore në rajon”. Kohët e fundit, ish-kryeministri Ehud Olmert dukej se e pranoi aftësinë bërthamore kur renditi Izraelin, së bashku me Shtetet e Bashkuara, Rusinë dhe Francën, si me armë bërthamore, megjithëse më vonë u përpoq të kundërshtonte komentet, të cilat u bënë në televizionin gjerman. Edhe Benjamin Netanyahu dikur iu referua Izraelit si një “fuqi bërthamore” gjatë një prezantimi në kabinetin e tij, përpara se të korrigjohej duke thënë “fuqi energjetike”.
Anëtarë të rinj të “klubit bërthamor”
Ndonëse arsenalet kryesore u përkasin dy superfuqive bërthamore, ka edhe fuqi të tjera bërthamore, si Britania e Madhe, Franca dhe Kina. Mee këto fuqi bërthamore të njohura botërisht, të quajtura “klubi bërthamor”, u bashkuan edhe India e Pakistani. Përveç këtyre vendeve, ka edhe disa të tjera, ku përfshihet edhe Izraeli, që shpesh përmenden si vende që përpiqen të kenë (ose ndoshta tashmë kanë) armë bërthamore. Konfliktet politike ku përfshihet qoftë edhe një anëtar i “klubit bërthamor”, madje edhe ndonjë nga anëtarët e rinj, mund të shkaktojnë luftëra ku të përdoren armët bërthamore. Kriza ndërmjet Indisë dhe Pakistanit, përbën rastin kur dy shtete iu afruan më shumë se kurrë luftës bërthamore, që nga Kriza Kubane e Raketave, shpjegon Buletini i shkencëtarëve bërthamorë. Gjatë fillimit të vitit 2002, duke parë situatën e rënduar, frika për një sulm bërthamor u bë shumë reale për një numër të madh njerëzish. Veç kësaj, zhvillimi i armëve të tjera të shkatërrimit në masë ka sjellë më tepër mundësi për të përdorur bombat bërthamore. Duke analizuar një raport sekret të Pentagonit, thuhet se përdorimi i mundshëm i armëve bërthamore për t’u shkatërruar vendeve armike arsenale me armë biologjike, kimike dhe armë të tjera të shkatërrimit në masë ndoshta është bërë pjesë e politikës bërthamore amerikane.
Terroristët dhe bombat me mbetje bërthamore
A është e mundur të ndërtohet një bombë bërthamore duke përdorur material që shitet në tregun e zi? Sipas revistës Time, përgjigjja është po. Kjo revistë fliste për një skuadër që u ngrit për të parandaluar terrorizmin bërthamor. Deri tani, skuadra ka montuar më shumë se një duzinë bomba artizanale duke përdorur pajisje teknologjike që i blen në dyqanet e zakonshme me gjëra elektronike dhe llojin e karburantit bërthamor që shitet në tregun e zi. Çarmatimi bërthamor dhe zbërthimi i armëve bërthamore e ka shtuar mundësinë për të vjedhur pajisje bërthamore. Heqja e mijëra armëve bërthamore ruse nga raketat, aeroplanët bombardues dhe nëndetëset e ruajtura mirë, e grumbullimi i tyre në depo më pak të sigurta, do t’i bëjnë shënjestra tunduese për terroristët e vendosur për t’i vjedhur ato. Në qoftë se pjesë nga armët bërthamore të zbërthyera i bien në dorë një grupi të vogël njerëzish dhe montohen përsëri së bashku, shumë shpejt ky grup mund të bëhet anëtar i klubit bërthamor”.
