Gazeta e famshme franceze, “L’Équipe”, ka njoftuar katër ndryshime në rregullat e çmimit të Topit të Artë, që vitin e fundit e fitoi Lionel Mesi. Janë bërë katër ndryshime madhore, që pritet të sjellin qartësim të situatës rreth lojtarit më të mirë. Kështu, rregulli i parë është: Do të analizohet sezoni, jo viti.
Deri më tani, për “Topi i Artë” merreshin në konsideratë performancat e futbollistëve përgjatë vitit kalendarik, nga janari në dhjetor, që ishte ekuivalente me dy gjysmësezone (nga sezone të ndryshme) dhe jo një sezon të plotë.
Tani e tutje do të vlerësohet ajo që është arritur përgjatë një sezonit futbollistik, nga gushti deri në korrik. Kupa e Botës në Katar, pra, nuk do të llogaritet për Topin e Artë të vitit 2022, por për të radhës, për atë të vitit 2023. Një ndryshim që praktikisht lë jashtë luftës për çmimin e radhës fituesin aktual, Leo Messi.
Pa Champions në raundin e 16-të dhe me një rol të rëndësishëm në Ligue 1, shansi i tij i vetëm ishte të fitonte ose linte shenjë në Kupën e Botës. Duke qenë Botërori i Katarit do të llogaritet për edicionin e ardhshëm, argjentinasi pothuajse përjashtohet si fitues për vitin 2022. Ndryshimi i dytë ka të bëjë me përzgjedhjen e kandidatëve. Topi i Artë ka tridhjetë kandidatë për çmimin e meshkujve, njëzet për femrat dhe dhjetë për trofetë “Iashin” dhe “Kopa”.
Ata përzgjidheshin nga “France Football” dhe “L’Equipe”, tani e tutje do të shtohet Didier Drogba, ambasadori i Topit të Artë, si dhe votuesit e edicionit të kaluar që iu afruan më shumë rezultatit përfundimtar. Ndryshimi i tretë lidhet me uljen e vendeve me të drejtë vote. Deri më tani, kanë votuar përfaqësues të 170 vendeve. “L’Équipe” analizon se vendet “të cilat nuk kanë një kulturë të madhe natyrore futbolli apo legjitimitet historik dhe që jo gjithmonë kanë akses në imazhet e garave kryesore” mund të dobësojnë jurinë.
Pra, zvogëlon numrin e vendeve me të drejtë vote. “Vetëm përfaqësuesit e 100 vendeve të para në renditjen e FIFA-s (50 për femrat) do të kenë mundësi të votojnë”. Kriteri i katërt që ndryshon ka lidhje me votimin. Si përmbledhje , kriteri 1 do të fokusohet kryesisht në performancën individuale të pretendentëve. Duke qenë se futbolli është ende një sport kolektiv, kriteri 2 do të fokusohet tek performanca kolektive dhe arritjet gjatë sezonit. Kriteri 3 do t’i referohet klasit të lojtarit dhe lojës së ndershme dhe 4 për mënyrën e votimit. Surprizë është zhdukja e kriterit të “karrierës së lojtarit”.
