Kryeministri Albin Kurti është deklaruar pas zgjedhjes së Vjosa Osmanit për presidente të re të Kosovës.
Kurti në një postim në Facebook ka thënë se me zgjedhjen e Osmanit presidente kanë fituar të gjithë.
Ai ndërkaq e ka pranuar se do të përballen me sfida gjatë punës së institucioneve të dala nga zgjedhjet e 14 shkurtit, por se ka shprehur besimin se së bashku do t’i dalin suksesshëm për interesin e përgjithshëm të vendit.
Postimi i plotë:
Sonte fituan të gjithë, fitoi shteti i pavarur, fituan qytetarët e vendit, fitoi republika dhe demokracia, fituan deputetët dhe partitë, fitoi kuvendi dhe qeveria. Sonte nuk ka humbës. Sonte fituam të gjithë. Sepse Kosova e fitoi Presidenten e saj, Vjosa Osmani-Sadriu, së cilës iu lexua emri 71 herë në raundin e tretë në Kuvend, pasi që me 14 shkurt e votuan mbi 300 mijë qytetarë.
Na presin shumë punë të mëdha e të vështira, në ditët e javët e muajt në vijim, në kushtet e një krize të shumëfishtë, ku pandemia e cila na u shtua para një viti është veçse njëra prej tyre. Por, bashkë gjithsesi do t’ia dalim, do të dalim së bashku të suksesshëm, sepse nuk do të ndalemi, sepse do të angazhohemi e kontribuojmë për interesin e përgjithshëm me vullnet të paepur.
Ju faleminderit të gjithëve. U jemi mirënjohës secilit.
