Kryeministri Albin Kurti së bashku me ministrin e Financave, Hekuran Murati mbrëmë vonë është takuar me kreun e BSKPK’së, Atdhe Hykollin. Ky takim përfundoi pa u përmbushur kërkesa prej 100 euro për mësimdhënësit, dhe pa u ndërprerë greva, që ka filluar për më shumë se 7 ditë.
Sipas komunikatës së ZKM-së, kryeministri Kurti e ka ftuar Hykollin që të konsultohet për Ligjin e Pagave. Ndërsa, Kurti po e vazhdon inatin me kryetarin e SBASHK’ut, Rrahman Jasharaj. Kryeministri pati deklaruar s’mund të takohet me Jasharajn, meqë është rregull që të takohet me kreun e BSKPK-së, Atdhe Hykollin, e jo liderë të degëve sindikale.
“Për më shumë se një orë u diskutua për grevën e shpallur nga BSPK-ja, për kërkesën sindikale për shtesën prej 100 euro dhe për veprimet e deritanishme të Qeverisë në trajtimin e kërkesave tjera paraprake të sindikatave. Kryeministri Kurti e njoftoi z. Hykolli se Projektligji për Pagat e Sektorit Publik këtë javë ka përfunduar fazën e konsultimeve paraprake dhe se gjatë javës që po vjen do të dalë në konsultime publike, teksa e ftoi BSPK-në që të bëhet pjesë e këtyre konsultimeve”, thuhet në komunikatë.
Mes tjerash, Kurti ka thënë se ka shprehur gatishmëri për të adresuar kërkesat sindikale për trajtimin e problemeve të punëtorëve të sektorit publik.
Kurti përmendi vendimin e MASHT’it për të ndarë 1.7 milionë euro për 300 mësimdhënës me probleme shëndetësore, trajtimin e barabartë të mësuesve klasorë dhe lëndor në arsimin e mesëm të ulët e disa të tjera.
“Si dëshmi mori vendimet e MAShTI-t për të ndarë 1.7 milionë euro për 300 mësimdhënës me probleme shëndetësore, për buxhet shtesë për mësimdhënësit që kualifikohen si tepricë ashtu që mos të mbesin pa punë, trajtimin e barabartë të mësuesve klasorë dhe lëndorë në arsimin e mesëm të ulët, eliminimin e padrejtësive ndërmjet të gjitha kategorive të punëtorëve të arsimit dhe renditjen e mësimdhënësve me koeficientin më të lartë ndonjëherë sipas projektligjit të ri”, thuhet në komunikatë.
