Ushtruesi i detyrës së presidentit, Glauk Konjufca, së bashku me deputeten Vjosa Osmani dhe ministren Donika Gevalla, kanë bërë homazhe tek memoriali i familjes Bogujevci dhe Duriqi në Podujevë. Nga aty u tha se asnjëherë nuk do të ndalen së kërkuari drejtësi.
Konjufca tha se kurrë nuk do të harrojnë krimet e Serbisë në Kosovë.
Konjufca: Jemi të vendosur që deri në fund t’i shkojmë drejtësisë
“Kjo është një masakër ku shumica e të vrarëve janë fëmijë dhe gra dhe kjo tregon për mizorinë e pashembullt të shtetit serbë dhe përmasat e gjenocidit që e ka bërë ndaj popullit tonë, duke mos i kursyer as fëmijët, as gratë as pleqtë…kjo na bënë edhe më të vendosur që deri në fund t’i shkojmë drejtësisë e ta kërkojmë pa pushim“, tha ai.
Deputetja Vjosa Osmani tha se krimet që ka kryer Serbia në çdo cep të Kosovës, është dëshmi e gjallë se qëllimi i Serbisë ishte shfarosja e popullit tonë.
Osmani: Nuk do të rreshtim kurrë së kërkuari drejtësi
“Nuk ka dëshmi më të fuqishme qoftë për ne këtu për brenda e qoftë secilin nga jashtë që dëshiron të kualifikojë atë se çfarë kanë ndodhur në Kosovë, për të dëshmuar gjenocidin që ka ndodh se sa vrasja e fëmijëve, vrasja e grave, vrasja e njerëzve të pafajshëm, të cilët të vetmin faj në thonjëza e kishin se ishin shqiptar, prandaj ne nuk do të rreshtim kurrë së kërkuari drejtësi, nuk do të ndalmi asnjëherë së qeni zëri juaj, zëri i secilit prind që ka humbur djalin e vet në mënyrë që ne sot ta gëzojmë shtetin tonë”, tha ai.
E deputetja Sarnda Bogujevci, e cila është edhe dëshmitare e krimit që ka ndodhur në familjen Bogujevci, ka thënë se përkujtimet e asaj çka ka ndodh në Kosovë, duhet të shërbejë për secilin që ta jap maksimumin e mundur për një të ardhme më të mirë.
Bogujevci: E kemi obligim ta krijojmë një të ardhme më të mirë për fëmijët
“Unë kam qenë fëmijë që kam mbijetuar dhe sot në familje kemi shumë fëmijë që kanë lindur pasluftës dhe janë duke u rritë dhe nuk e kemi vetëm obligim që ta kemi lirinë e plotë për ata që kanë ra për vend por kemi për obligim edhe për këta të rinj që i kemi sot dhe për të krijuar një të ardhme më të mirë për ta“, ka thënë ajo.
Shpejtim Buliqi tha se këto përvjetore ngjallin ndjenjën e dhimbjes për këto familje por ngjallë edhe ndjenjën e krenarisë pasi mbi gjakun e tyre janë vënë themelet e shtetit tonë.
