I tërbuar nga dosja si bashkëpunëtor i Sigurimit të Shtetit, Ilir Meta ka reaguar edhe përmes ish-zëdhënësit të tij në Presidencë, tashmë Sekretar i Përgjithshëm i Partisë së Lirisë, Tedi Blushi.
Në reagim, Blushi pyet Ramën se si paguhej nga Sigurimi i Shtetit.
“Edi.K.R apo Edvin Kristaq Rama, a ke marrë rrogë apo honorare nga Sigurimi i Shtetit për punën që kryeje në revistën e këtij organi “Në shërbim të popullit”? Kush të gjeti punë në revistën e Sigurimit “Në shërbim të popullit” dhe në këmbim të çfarë? Çfarë të lidh ty me spiunen “Neta” që karikaturove në revistën e Sigurimit? A i ke ofruar Sigurimit ndonjë shërbim EKSTRA në 3 nëntor 1988. Kush ishte përkthyesi dhe çfarë të lidh ty me dosjen “Scavolini”? Po raportin ti e shkruajte? Kush është spiuni i faktuar N.L dhe a je i sigurt që nuk re në kurthin e “Radio Lojës”?”, shkruan ai.
Përmes Tedi Blushit, Meta mohon se Gentiana Sulën e ka promovuar ai në qeveri dhe te Dosjet.
“Karikaturisti me pagesë i Sigurimit të Shtetit, Edi.K.R apo Edvin Kristaq Rama mashtron rëndë kur pretendon se kryetaren e Autoritetit të Dosjeve ia ka propozuar Meta. Të gjithë e dinë se ajo ka qenë Zëvendësministre e Veliajt (djali i instruktore Shpresës), e preferuara e tij dhe e Ramës. Për më tepër, që karikaturisti me pagesë i revistës së Sigurimit “Në shërbim të popullit”, e di më mirë se kushdo që takimet apo bisedat për të cilat pretendon janë të dokumentuara”, shkruan.
Sekretari i Përgjithshëm i PL thotë se “ajo që ka ndodhur është shumë e rëndë dhe Rama është përgjegjësi kryesor që ka urdhëruar manipulimet dhe falsifikimiet. Ka shumë gjëra që kanë çmim. Por kurrë Dinjiteti dhe Nderi. Djali i Netës i di shaka këto. Më keq për të dhe tarallakët që e ndjekin në këtë marrëzi! Boll u fshehe pas fustanit të grave dhe të mamit. Përgjigju tani”.