Hyrjet e shtetasve shqiptarë dhe të huaj në territorin shqiptar, në muajin mars 2021, shënoi rritje me 44.8 % krahasuar me marsin e vitit 2020 që përkon edhe me kufizimin e lëvizjeve të shtetasve në pothuaj gjithë botën për shkak të pandemisë së virusit Sars-Cov-2.
Gjithsej sipas raportit të publikaur sot nga INSTAT janë 394.478 qytetarë të huaj dhe shqiptarë që kanë hyrë në territorin tonë.
Numri i shtetasve të huaj që kanë hyrë në territorin shqiptar është 170.279 ose 78,6 % më shumë se në marsin e 2020-s.
“Ndryshimet në përqindje të treguesve të lëvizjes së shtetasve, janë ndikuar nga masat e pandemisë të vendosura në muajin mars 2020”, bën të ditur INSTAT.
Sipas INSTAT, numri i shtetasve të huaj të hyrë në Shqipëri gjatë tremujorit të parë të 2021 është 513.781, duke rënë me 10,4 %, në krahasim me të njëjtën periudhë të vitit 2020.
Gjatë tremujorit të parë të 2021, ndër vendet që kanë hyrjet më të larta të shtetasve në Shqipëri, Kosova ka pasur rritjen më të madhe me 38,3 % dhe Zvicra me 32,7 %, ndërsa uljen më të ndjeshme e ka pasur Greqia me 83,5 % dhe Anglia me 70,5 %, krahasuar me të njëjtën periudhë të vitit 2020.
Ndërkohë daljet e shtetasve shqiptarë dhe të huaj nga territori i Shqipërisë, gjatë muajit mars 2021, janë 413.443 duke shënuar një rritje me 45,1 %, krahasuar me të njëjtën periudhë të një viti më parë.
Numri i shtetasve shqiptarë të dalë nga territori i Shqipërisë gjatë tremujorit të parë të 2021, është 756.405 duke rënë me 31,3 %, krahasuar me të njëjtën periudhë të një viti më parë./ATSH
