I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, ka thënë se vetë Sekretari i Shtetit, Antony Blinken, i ka kërkuar qeverisë që të shtyjë vendimin për targat.
Escobar ka shtuar se, përveç Blinken, janë edhe vendet e QUINT-it, ato që i kanë bërë kërkesën e njëjtë qeverisë, shkruan lajmi.net.
Ai ka thënë se kjo kërkesë është bërë në mënyrë që të krijohen kushte më të mirë për zbatimin e duhur të saj.
“Biseda jonë për këtë është ende në një fazë të ndjeshme. Shpresoj shumë që do të zgjasin afatin, shpresoj se do të pranojnë kërkesën e vendeve të QUNT-it dhe kërkesën personale të Sekretarit të Shtetit për ta shtyrë atë për ta bërë zbatimin më pak kaotik dhe për të krijuar kushtet për zbatimin e duhur”, ka thënë ai për RTS.
Po ashtu, i dërguari i SHBA-ve, ka deklaruar se kjo kërkesë është bërë edhe për arsyen që edhe qeveria e Kosovë të përgatitet më mirë për zbatimin e saj, dhe se ata janë ende në kërkim të 10 muajve të mbetur, nga ata që kanë kërkuar.
“Zbatimi filloi gjatë verës. Më pas kërkuam një shtyrje për një vit të zbatimit për t’u përgatitur më mirë, në mënyrë që ata vetë të përgatiteshin më mirë. Që atëherë kanë kaluar dy muaj, kështu që ne jemi ende në kërkim të dhjetë muajve të mbetur”, ka deklaruar Escobar. /Lajmi.net