Arlinda Prenaj është modelja, e cila ka “rrëmbyer” kurorën e “Miss Grand Kosova 2019”, “Miss Grand Germany 2020” dhe tani ishte konkurrentja favorite për “Miss International World”.
Arlinda Prenaj është një vajzë shqiptare, entuziaste, e bukur dhe modeste. Ajo bëri shumë “zhurmë” në Gjermani. Madje, u komentua si vajza më delikate dhe karizmatike në elegancën e saj dhe stilin e veshjes, shkruan albinfo.ch.
Ajo “rrëmbeu” dy herë kurorën e më të bukurës shqiptare nga Kosova dhe Gjermania. Tani është pretendente edhe për fitimin e kurorës botërore, “Miss International World”.
Modelja shqiptare, Arlinda Prenaj, tregoi për Albinfo.ch rreth arritjeve të saj profesionale, në fushën farmaceutike, përfshirë suksesin edhe në muzikë dhe angazhimin e saj si modele.
Nga Kosova, në Gjermani
Ajo lindi në Kosovë dhe në moshën 2-vjeçare emigroi së bashku me familje në Gjermani. Hapat e parë të shkollimit i mori në Munchen, ku në të njëjtin vend kreu edhe studimet për farmaci, shkruan albinfo.ch.
“Në moshën 2-vjeçare prindërit vendosen të vinin në Gjermani për të jetuar, pasi që babai ka punuar edhe më parë në Gjermani. Jam rritur në qytetin Mûnchen. Hapat e parë të shkollimit i kam marrë në qytetin ku kam jetuar dhe po aty i kam përfunduar studimet e farmacisë. Punoj me orë të gjata në farmaci, ndërkohë që këndimin e kam pasion dhe në kohë të lirë lexoj shumë. Jam person familjar dhe mundohem t’i kushtoj kohë sa më shumë familjes time dhe po ashtu shoqërisë”, tregon ajo.
Sa i përket jetës dhe shoqërisë në Gjermani, ajo tregon se nuk ka qenë aspak e vështirë ambientimi i saj me rrethin shoqëror dhe se ndjehet e barabartë me të gjithë, pa paragjykime.
“Nuk ishte aspak e vështirë të ambientohem në rrethin shoqëror të Gjermanisë, pasiqë isha shumë e vogël kur erdha dhe jam rritur me gjuhën dhe kulturën gjermane”, shprehet Arlinda.
Ndërkohë në fushën e modelizmit filloi papritur, që në moshën 13-vjeçare ajo kishte oferta për modelizëm, ani pse në fillimet e saj nuk ishte e interesuar fare.
“Puna e modelizmit ishte një gjë që ka ndodhur në mënyrë të rastësishme. Në moshën 13-vjeçare filluan ofertat e para për modelizimin. Por, në atë moshë isha shumë e re dhe nuk më ka interesuar asnjëherë kjo pjesë, pasi isha duke u marrë më shumë me muzikë”, tha ajo.
Fituese e kurorës “Miss Grand Kosova 2019”
Në vitin 2019 bukuroshja me origjinë nga qyteti i Prishtinës, Arlinda Prenaj, ka fituar kurorën e “Miss Grand Kosova 2019”, shkruan albinfo.ch.
“Kur fitova kurorën e “Miss Grand Kosovo”, ka qenë ndjenjë e papërshkruar dhe, në fakt, për mua çdo gjë e papritur, pasi edhe pjesëmarrja ka qenë shumë e rastësishme. Vlen të ceket se rrugët më ishin hapur edhe më parë në tregun e modelizmit, por zgjidhja si miss nga Kosova për mua ishte vërtet mbresëlënëse”, tregoi ajo.
Arlinda “rrëmbeu” edhe kurorën e më të bukurës gjermane
Për Arlindën, depërtimi në tregun e Gjermanisë për modele nuk ka qenë aspak e vështirë, pasiqë ofertat e saj për modelizëm e kishin kalitur atë që të kuptojë mirë botën e modelizmit, pastaj edhe zgjidhja e saj si Miss Kosova e forcoi edhe më shumë vetëbesimin e saj në këtë fushë, shkruan tutje albinfo.ch.
“Miss Grand Germany 2020” është një ndër tri kompeticionet më të rëndësishme të bukurisë botërore, dhe së fundmi, zgjodhen Arlinda Prenajn më të bukurën e Gjermanisë.
Duke qenë se kishte një konkurrencë të madhe në këtë garë, për të fituar “Miss Grand Germany” Arlinda nuk e priste që do të ishte fituese e këtij eventi.
“Ishte një pjesëmarrje e 100 vajzave më të bukura dhe të zgjuara, ku konkurrenca ishte shumë e madhe. Unë, ani pse isha konkurrente, mendoja se cilat vajza mund ta fitonin këtë garë. Kjo ngase juria ka vlerësur shumë kriterie, se si jemi në momente të stresuara, si flasim, si ecim, si ushqehemi dhe shumë gjëra të tjera. Mirëpo, se unë do të isha konkurrentja fituese, për mua ishte shumë e papritur. Në asnjë moment nuk e kam mendur se do ta fitoj prapë një kurorë dhe isha totalisht pa fjalë”, rrëfen Arlinda për albinfo.ch.
Duhet theksuar se për shkak të pandemisë që ka kapluar gjithë botën, ishte e pamundur që të mbahej sfilata fituese, andaj zgjedhja u bë Online Live.
Pas këtij triumfi, bukuroshja në fjalë do të përfaqësojë Gjermaninë në garat internacionale.
Kosova, vend i dëshirës
Nga ana tjetër, Arlinda është shumë e lidhur me Kosovën, ajo tregon se zemra i rreh ndryshe kur prek tokën e Kosovës, ku atje jetojnë edhe shumë familjarë të saj, duke e bërë një lidhje të ngrohtë me ta.
“Me Kosovën jam e lidhur shumë, mbi të gjitha, është vendlindja ime dhe kam mall për të. Mundohem të vij shpesh, sipas mundësive, së paku një herë në vit kam dëshirë ta vizitoj vendin tim”, shprehet ajo. /Albinfo.ch
