Kjo javë solli një frymë të re në jetën politike dhe shoqërore të Kosovës duke i thyer stereotipet e deritashme të zgjedhjes së pushtetarëve.
Kthimi nga mërgata i ekspertëve elitarë, arkitektit Përparim Rama nga Londra dhe profesori universitar shqiptaro-amerikan dr.Rifat Latifit nga SHBA, shënon një pjekuri kombëtare e qytetare ndër ne.
Kjo ngjarje hap një shteg të ri për Kosovën, një vizion drejt perspektives së mbarë dhe një besim te qytetarët se shteti po ndërtohet nga vlerat elitare që i kemi po ashtu në shtetet elitare të botës.
Emrat domethënës Përparim Rama dhe Rifat Latifi më shumë paraqesin vlera të edukatës qytetare e kombëtare, se sa frymë të konjukturave partiake.
Sjellja e skemave të punës në Kosovë nga vendet ku janë ngritur këta dy ekspertë dhe aplikimi me çdo kusht i tyre do ta barazojë më shpejt shtetin tonë me vlerat e shteteve me traditë.
Në vend të vajtimit hipokrit të deritashëm të elitave politike „se Kosovës po i derdhet truri jashtë“, qytetarët vendosën që truri i „derdhur“ të kthehet brenda. Kjo pjekuri duhet të përshendetet dhe të vazhdojë të leviz tutje.
Duhet shtuar këtu se mërgatën tonë aktuale nuk e përben më shqiptari i klithjes së dhembshme të poetit Esad Mekuli „o vëlla me sharrë në krah“, por shqiptari që kryen universitete europiane e amerikane dhe ligjëron në to. Mërgata shqiptare sot në botë nuk ka më një a dy intelektualë, por me mijëra. Vetëm kthimi sporadik i tyre do ia ndërrojë fytyrën Kosovës.
Në disa raste, eliatat e mëparshme partiake, sollën nga mërgata njerëz që i kouptuan në politikë, të cilët ishin diletantë në çdo sferë të jetës e aspak profesionistë, që qytetarëve ua dogjën kohën derisa kompromituan mandatet e tyre.
Personalitetet si Përparim Rama dhe Rifat Latifi nuk nderojnë vetëm veten, por e bëjnë krenar qytetarin e Kosovës kudo që është. Urime të zgjedhurve.
F. Tasholl