Zyrtarët policor në Vushtrri mbrëmë kanë ndërhyrë në një kafiteri duke rrezikuar jetën e tyre.
Sipas policisë, gjatë orëve të natës së datës 6 maj, Policia në Vushtrri ka pranuar një thirrje emergjente, për një zjarr që kishte kapluar një lokal (kafiteri) në Vushtrri.
“Me të pranuar informacionin drejt vendit të ngjarjes me urgjencë kanë reaguar njësitë policore, njëkohësisht janë njoftuar zjarrfikësit. Me të arritur në vendin e ngjarjes, zyrtarët policorë kanë vërejtur se tymi që po dilte nga lokali ishte rrezik potencial për banorët që banonin sipër në atë ndërtesë. Me qëllim të parandalimit dhe evitimit të rrezikut në shkallë të gjerë zyrtarët policorë në rrethana të tilla duke rrezikuar jetën dhe shëndetin e tyre kanë depërtuar brenda hapësirave të lokalit për t’u vërtetuar se a ndodhej ndonjë person në lokal, si dhe i kanë hapur dritaret për lirimin e tymit në pjesën tjetër. Ndërkohë në vendin e ngjarjes kanë arritur njësia e zjarrfikësve të cilët kanë lokalizuar zjarrin që rrezikonte të përhapej”, thuhet në njoftim.
Përveç dëmeve material të lënduar nga ky incident nuk ka pasur.
