Basketbollistët e Pejës shënuan sot fitore kundër Trepçës me rezultat 84:76, në kuadër të javës 26 të Superligës së Kosovës FIVE STAR.
Pejanët nisën ndeshjen më mirë, duke pasur epërsi konstante në çerekun e parë, kurse epërsinë më të lartë e arritën në 23:14, por mysafirët nuk u dorëzuan dhe ngushtuan në 25:21. Verdh-e-zinjtë ishin më të mirë në periudhën e dytë, duke thelluar epërsinë në 15 pikë, 52:37, derisa pjesa e parë përfundoi 52:39.
Trepça nuk u dorëzua dhe në periudhën e tretë dominoi në tërësi, duke ngushtuar shifrat me kalimin e minutave, kurse rezultati në semafor pas 30 minutash ishte 65:60. Dhjetë minutat e fundit ishin mjaft interesante, por në dy minutat e fundit (73:71) vendasit ishin më të përqendruar, duke shënuar fitore 84:76.
Te Peja u dalluan Lis Shoshi me 23 pikë e 9 kërcime, Brandon Walters me 17 pikë e 13 kërcime dhe Dardan Berisha me 24 pikë, ndërsa te Trepça u dalluan Dino Butorac me 21 pikë, Drilon Hajrizi me 18 pikë e 10 kërcime dhe Stavros Toutzaiarkis me 13 pikë e 12 kërcime.
Peja ka 14 fitore dhe 12 humbje, ndërsa Trepça 10 fitore dhe 16 humbje.
