Kryetari i Aleancës për Ardhmërinë e Kosovës, Ramush Haradinaj ka bërë thirrje për mbështetje të regjistrimit të popullsisë në Maqedoninë Veriore.
Kryetari i Aleancës për Ardhmërinë e Kosovës, Ramush Haradinaj ka bërë thirrje për mbështetje të regjistrimit të popullsisë në Maqedoninë Veriore.
Derisa ka folur për shqiptarët në diasporë, ai ka thënë se ky proces është i lehtë dhe se një gjë e tillë ndihmon familjen dhe atdheun.
Ai pas takimit me zëvendëskryeministrin e Maqedonisë së Veriut, Artan Grubi, ka theksuar se ky takim ishte i fokusuar në regjistrimin e popullsisë, duke shtuar se duhet të ndihmojnë dhe sensibilizojnë të gjithë për një proces të tillë.
Haradinaj: Regjistrimi është proces i qartë, është akt që ndihmon atdheun
(Video)
“Ne kemi shumë çka të flasim bashkë, se i ndajmë edhe ndjenjat edhe vlerat edhe çdo gjë tjetër. Por, kësaj here zëvendëskryeministri i parë i Republikës së Maqedonisë së Veriut… të ndihmojmë, të sensibilizojmë, vetëdijësojmë të gjithë për regjistrimin e popullsisë në Maqedoni. Fjala është për shqiptarët nga Republika e Maqedonisë që jetojnë në diasporë. Kësaj here duhet të jemi gjithë bashkë që të ndihmojmë regjistrimin e shqiptarëve në Maqedoni. Është proces i lehtë, i qartë dhe duke e bërë këtë akt ata ndihmojnë vetën, familjen dhe atdheun e tyre”, tha Haradinaj.
Ndërsa, zëvendëskryeministri Artan Grubi theksoi se përveç çështjes së regjistrimit, me Haradinaj ka biseduar edhe për përfundimin e autostradës për lidhjen Prishtinë-Shkup, si dhe bashkëpunimin ekonomik.
Grubi: Të drejtat e shqiptarëve varen nga përqindja në të cilën ata janë të përfaqësuar
(Video)
“Të drejtat e shqiptarëve dhe komuniteteve tjera në përputhje me Kushtetutën në Maqedoni varen nga përqindja në të cilën ato janë të përfaqësuar. Edhe pse të drejtat e shqiptarëve në Maqedoni janë në proces të pakthyeshëm dhe do të mbesin ato që janë, pa marrë parasysh qytetarëve që do të regjistrohen. Por për zhvillim të politikave do të ishte mirë që të gjithë të regjistrohen në diasporë e pastaj edhe si rezident”, tha Grubi.
Grubi gjatë ditës pritet të takohet edhe me ushtruesen e detyrës së presidentes, Vjosa Osmanin, kryetarin e Lidhjes Demokratike të Kosovës, Lumir Abdixhikun, dhe kryetarin e Nismës Socialdemokrate, Fatmir Limaj. /Sh.Pajaziti / KP /