Kryetari i Aleancës për Ardhmërinë e Kosovës, deputeti Ramush Haradinaj ka kërkuar nga ekzekutivi që të ndërpriten gjobat për qytetarët lidhur me masat për kontrollimin e pandemisë, të largohet ora policore dhe të hapet tërësisht gastronomia, pa masa mbrojtëse. Haradinaj ka thënë se masat aktuale të qeverisë vetëm rëndojnë jetën e qytetarëve dhe vështirësojnë funksionimin e bizneseve.
Në seancën e Kuvendit të Kosovës ku po zhvillohet debat parlamentar lidhur me situatën e krijuar nga pandemia me Covid-19, Haradinaj ka thënë se qeveria duhet të fokusohet në sigurimin e vaksinave dhe në përkrahjen e bizneseve.
Haradinaj: Qeveria të sigurojë vaksinat dhe bëhet kujdes me ekonominë
“Të fokusoheni të sigurimi i vaksinave, vaksina të sigurta jo me origjinë të dyshimtë, por edhe pa vonesë, pra mos humbni kohë ju lutëm. Njëkohësisht, deri në sigurim të vaksinave bëni kujdes të siguroni ilaqet, medikamentet falas për pacientët me Covid, ju e dini koston për çdo pacient. E shoh që është tepër me rëndësi që në kohë të pandemisë, në kohë të krizës shëndetësore, të bëhet kujdes me ekonominë, vazhdoni siguroni pako financiare për të prekurit nga kriza ekonomike në vazhdimësi sa të zgjatë pandemia, pra të keni një plan të vazhdueshëm pako financiare”, ka thënë Haradinaj.
Sipas tij, Qeveria e Kosovës duhet të ketë plan të vazhdueshëm për lehtësira fiskale për nxitje për bizneset në Kosovë, në mënyrë që, siç tha ai, të ruaj apo edhe hap vende të reja të punës.
Haradinaj: Të hapet gastronomia dhe sallat e mëdha të dasmave
“Ndërkreni menjëherë presionet ndaj bizneseve dhe gjobat ndaj qytetarëve, nuk është praktikë e duhur në kohë krize ekonomike dhe në kohë vështirësie për secilin, ndëshkimi financiar…Hapni gastronominë, lejoni sallat e mëdha, edhe ajo e dasmave nuk është më e madhe se kjo sallë, nuk hynë më shumë njerëz se në këtë sallë, hapni sallën por me masa mbrojtëse, njëkohësisht hiqni orën policore, ora policore u vështirëson jetën njerëzve, nuk ka arsye me mbajt orë policore në këtë kohë”, ka shtuar ai.
Ai ka sugjeruar ekzekutivin që mos të ulë pagat e pensionet.