Kryetari i Partisë Demokratike (PD), Lulzim Basha, në një prononcim për media nga selia e partisë deklaroi se numërimi i votave do të përfundojë me fitoren e madhe të Aleancës për Ndryshim, koalicion ky që udhëhiqet nga partia e tij.
Basha u shpreh se Partia Socialiste (PS) ka humbur thellë numrin e votave të numëruara në Tiranë, në zonat e mbyllura, në Përmet, Këlcyrë e Memaliaj.
Basha: PD rriti votat e saj
“Kemi të bëjmë me një humbje të thellë të Partisë Socialiste dhe një fitore, një rritje të numrit të votave për Partinë Demokratike, për koalicionin për ndryshim. Ky është fillimi pas kutive që shpresonin t’i kishin bastion, ku qartësisht janë ndëshkuar siç ishte zona 10 në Tiranë, ku Partia Demokratike ka një rritje prej 30% dhe PS-ja ka një rënie prej 200 votash, apo në zonën e Memaliajt, Këlcyrë, Përmet ku po kështu janë ndëshkuar qartësisht nga qytetarët do të vij dhe radha e kutive të tjera. Por ajo që është e qartë si dritë dielli, është deri sa janë ndëshkuar në ato që i ishin bastione, ne presim që vota për ndryshim të vazhdojë dhe fitorja e Aleancës për Ndryshim të konfirmohet në të gjithë vendin”, deklaroi Basha.
Kreu i Partisë Demokratike ka ftuar socialistët t’i lënë lojërat, pasi sipas tij, janë ata që kanë bllokuar numërimin në Kamëz dhe Paskuqan dhe që përpiqen të bllokojnë numërimin në Durrës e kudo tjetër.
Ai ka kërkuar që të vazhdojnë numërimi dhe të kuptohet vullneti i popullit.
Basha: Fitorja e PD është e padiskutueshme
“Vullneti i popullit është në ato kuti, numërimi do të bëhet në mënyrë strikte dhe rigoroze sipas ligjit dhe unë jam i bindur që ashtu siç janë kthyer në ato që i konsideronin bastionet e tyre, ashtu në fund të këtij numërimi, ndryshimi do të jetë i prekshëm për të gjithë. Fitorja e Aleancës për Ndryshim është e padiskutueshme, fitorja e Shqipërisë do t’i takojë çdo shqiptari”, përfundoi Basha.
