Të paktën 21 persona, mes tyre 10 fëmijë, janë vrarë nga një zjarr në një ndërtesë në një kamp refugjatësh në Rripin e Gazës, bën me dije BBC.
Numri i vdekjeve në kampin e refugjatëve Jabalia pas zjarrit, që tani është nën kontroll, ka të ngjarë të rritet, tha drejtori i spitalit, Dr Salah Abu Laila.
Një zyrtar lokal i sigurisë i tha BBC-së se nga një hetim fillestar rezultoi se pati një rrjedhje gazi nga një kuzhinë. Sipas tij, familja po festonte kthimin e një të afërmi të tyre nga jashtë.
Presidenti palestinez me bazë në Bregun Perëndimor, Mahmud Abbas, e quajti zjarrin një tragjedi kombëtare dhe e shpalli ditë zie të premten.
Ministri izraelit i Mbrojtjes, Benny Gantz shkroi në Twitter se stafi i tij do të ndihmonte me evakuimet humanitare të të plagosurve në spitalet izraelite.
Zjarret vdekjeprurëse, shpesh të shkaktuara nga qirinjtë, janë bërë një dukuri e rregullt në Gaza për shkak të mungesës së madhe të energjisë elektrike. Këto janë të lidhura me bllokadën e vendosur në territor nga Izraeli dhe Egjipti si masë sigurie kundër militantëve atje, dhe me mosmarrëveshjet e brendshme politike palestineze.
Në Gazë jetojnë 2.3 milionë njerëz, një nga dendësitë më të larta të popullsisë në botë. Sipas OKB-së, pothuajse 600,000 refugjatë në Gaza po jetojnë në tetë kampe të mbushura me njerëz.