Presidenti rus Vladimir Putin ka shpërthyer këtë të enjte me deklarata të forta teksa është shprehur se dominimi i Perëndimit ka mbaruar, ndërsa bëri thirrje për një rend të ri botëror.
Lideri i Kremlinit akuzoi Perëndimin se ndezi konfliktin në Ukrainë dhe Tajvan, se ka krijuar një krizë globale energjetike dhe ka shkaktuar një krizë urie në botë.
Ai nuk u ndal këtu. Më tej, Putin paralajmëroi se bota ka hyrë në periudhën e saj më të rrezikshme që nga Lufta e Dytë Botërore dhe duhet të krijohet një rend i ri botëror, në të cilin, sipas tij, Rusia duhet të ketë vendin kryesor.
“Perëndimi nuk është më në gjendje t’i diktojë njerëzimit vullnetin e tij, por ende përpiqet ta bëjë atë, dhe shumica e kombeve nuk duan më ta tolerojnë atë. Në këtë lojë, Perëndimi synon dominimin e botës, por kjo është një lojë e rrezikshme, vdekjeprurëse dhe e pistë”, u shpreh Putin.
Ai theksoi se Perëndimi kërkon ta shfarosë Rusinë. Një sfidë për mbijetesë, edhe pse shefi i Kremlinit kërkoi të hiqte çdo frikë për një luftë bërthamore. “Nuk kemi nevojë të përdorim armë bërthamore në Ukrainë, nuk do të kishte sens, as politikisht dhe as ushtarakisht”, tha Putin.
Ndërkohë, Rusia provoi gatishmërinë e saj ndaj një sulmi bërthamor të mërkurën, gjatë stërvitjeve vjetore që përfshijnë nëndetëset bërthamore, bombarduesit strategjikë dhe raketat balistike, ndërsa presidenti Vladimir Putin ndiqte manovrat përmes lidhjes me video.
