Personi me inicialet B.N ndaj të cilit u ngrit aktakuzë nga Prokuroria Speciale për keqpërdorime në Aeroport është Bahri Nuredini, nipi i komandantit Adem Jashari. Ndërkohë, Gazeta Online Reporteri.net merr vesh se i akuzuari tjetër është Driton Mehaj, që ka qenë menaxher i projektit për blerjen e Radarit të Goleshit.
“Prokuroria Speciale njofton opinionin publik se gjatë periudhës kohore nga muaji shtator 2011 deri në gusht 2018, në vazhdimësi dhe në cilësinë e personave zyrtarë në Aeroportin Ndërkombëtar të Prishtinës (ANP), më pas Agjencia e Shërbimeve të Navigacionit Ajror (AShNA), të pandehurit B.N. dhe D.M e kanë keqpërdorur detyrën zyrtare duke i mundësuar OE “TCN” nga Tirana, përfitim të kundërligjshëm.”, thuhet në njoftimin e Prokuroria Speciale e Republikës së Kosovës.
Bahri Nuredini së bashku me dajën e tij Bekim Jashari kishin qenë nën hetim për keqpëdorimin e mbi 8 milionë euro.
Sipas raportimeve të mediave, aktakuza është ngritur mbi dyshimet për keqmenaxhimin e tenderit për blerjen e Radarit të Goleshit në vlerë prej 8 milionë eurosh, i cili ishte prishur vetëm pak muaj më pas.
Radari i Goleshit kishte pasur prishje në vazhdimësi çka edhe kishte ngritur dyshime se ai nuk ishte sjellë i ri, pavarësisht që kompania që e kishte shitur e mohonte një gjë të tillë.
Task-Forca Anti-korrupsion në kuadër të Prokurorisë Speciale të Kosovës, kishte filluar hetimet lidhur me një keqpërdorim të vitit 2011, që kishte ndodhur në Aeroportin Ndërkombëtar të Prishtinës. Dyshohet se në tenderin për paisjet e navigacionit ajrorë ishin keqpëdorur mbi 8 milionë euro. Asokohe, drejtor i Bordit të Aeroportit ishte Bekim Jashari.
Në vitin 2011 AShNA (Agjencia për Shërbime të Navigacionit Ajror) kishte shpallur tenderin për projektin “Furnizimi dhe instalimi i pajisjeve të navigimit ajror”.
Vlera e këtij tenderi peshonte 8.1 milionë euro.
Kontrata i ishte dhënë, një kompanie me emrin “TCN” dhe ai ishte gati i finalizuar, por për shkak të një borxhi prej afro 600 mijë eurove, që AShNA-i i kishte kësaj kompanie, ajo e paditi këtë institucion. Me këtë, kontrata praktikisht u prish dhe projekti nuk u realizua.
Pjesa më e madhe e parave i ishte dhanë kompanisë “TCN-së”, por shumica e pajisjeve kurrë nuk u sollën në Aeroport nga kjo kompani private.
Për këtë skandal në Aeroportin e Prishtinës, hetuesit e Zyrës së Bashkimit Evropian për Inteligjencë Kriminale kishin bërë një raport të veçantë. Raporti që ishte publikuar në media, ngriste dyshime për keqpërdorime financiare në projekte milionëshe.
Hetuesit e EUOCI’it kishin rekomanduar se këto dyshime duhet të hetohen me patjetër.
