Çështja e liberalizimit të vizave për Kosovën do të kthehet sot në agjendën e ambasadorëve të vendeve të Bashkimit Evropian.
Kështu kanë konfirmuar nga Presidenca Çeke në BE.
Në faqen zyrtare të Këshillit Evropian është publikuar agjenda e plotë e takimit të grupit të njohur si Coreper.
Sipas këtij njoftimi, takimi pritet të fillojë në orën 09:00.
Në një përgjigje për Reporteri.net nga Presidenca Çeke ditë më parë kishin deklaruar se “janë shumë afër një kompromisi në Këshill për çështjen e liberalizimit”.
Data e re për këtë proces është 1 janar 2024, kishin thënë nga Presidenca Çeke.
Gjatë javës së kaluar propozimi për liberalizimin e vizave për Kosovën, i cili parashihte lëvizjen e lirë jo më larg se data 1 janar e vitit 2024, u hoq nga agjenda e ambasadorëve të vendeve anëtare të BE-së dhe u kthye sërish pas marrëveshjes për targa që çoi në shtensionimin e situatës në veri.
Liberalizimi i vizave për Kosovën është lidhur paralelisht me funksionalizimin e sistemit ETIAS.
ETIAS është një sistem i ri, i cili pritet të vihet në funksion nga Bashkimi Evropian, ku qytetarët e shteteve që kanë liberalizim të vizave duhet të regjistrohen para se të udhëtojnë. Një regjistrim pastaj do të ishte i vlefshëm për tre vjet.
